Psa 141 | MMX | STEP | Leeme Silok, a ro ke ram at na loxonaleng kusu una lok tooro nga ia! Una ronga ia at loxonaleng a ro ke ram.

Psalms 141

Lisingising Ti Leng Kantinao

1 Leeme Silok, a ro ke ram at na loxonaleng kusu una lok tooro nga ia! Una ronga ia at loxonaleng a ro ke ram. 2 Una siam ka lisingising tarak ngan ta lusuxa i so mavak, la una siam ka lukngak angosong aurut min naba lok ngan ta laplavang tu ukantinao.

3 Leeme Silok, una lok li taradi rutu mu ram nade at lungusno rak, la naba reven tatao bok levelinga at lubulubun tarak. 4 Una beng ia basinge lavavara rik lok laxapmek, la basinge lentangas eburu mi luvuttadi loklok kakapmek. A vara i do a noxo anan eburu midi at lara peluxa atdi.

5 I lox avukat do laradi nunuan na vaase sox ia mumu laxakapmek kopla na sep aleeng ia, ketla a noxo siam kaka loklox asinorong at luvuttadi xapmek; a ngising amisik kusu Leeme Silok na lok kepe mo leveloklok kakapmek atnedi. 6 La amo do dina so gingin suu mi lubung amgomgo atnedi boro vana at labarabaras buang uat, limixin diba tong asu ba i dola lavapaase aronga rak ga ruturun. 7 Naba ngan loxonuna di vagam i, la dira ra koxorop axakalik i, kuren la laxan si atdi bak midi ekarakat go at lisigege at lamaut (larabuang).

8 Ketla nia move a nuunu saga ram, Leeme Silok, Loorong Avolo rak; a vara i do unak lok see rak, la uguta ke xepe ia ana met! 9 Una lox asepsu ia basinge laxampelixo mo di liili pe ia min, la basinge mo lempang kutkut at luvuttadi xapmek. 10 A vara i do limixin kapmek dinaba oon tubun axa at lara pelixo atdi kusu nia nabat pas sepsu la a noxo ruuna ka taniu.